جس وقت نہا کر تو کسی جھیل سے نکلے

جس وقت نہا کر تو کسی جھیل سے نکلے

وہ پل نہ مری آنکھ کی تحویل سے نکلے

نم کر گئیں کاغذ کو ترے ہجر کی نظمیں

اس باب میں آنسو بڑی تفصیل سے نکلے

ارباب سیاست سے مدد مانگ کے کچھ لوگ

اس ملک سے باہر ہیں کسی ڈیل سے نکلے

اوروں کے لیے وجہ تفاخر ہیں سر دست

جو لعل و گہر تھے مری زنبیل سے نکلے

اک بات تھی قرآن کی آیت تو نہیں تھی

پھر بھی جو معانی مری تاویل سے نکلے

مت پوچھ کہ اس بات کی جو مجھ کو خوشی ہے

آنسو ہیں ہر اک شعر کی تکمیل سے نکلے

ان کو بھی زمانے کی ہوا لگ گئی یاورؔ

وہ لوٹ کر آئے ہیں تو تبدیل سے نکلے