jis waqt usne baKHt hamare banae the

jis vaqt us ne baḳht hamāre banā.e the

ham ne hatheliyoñ pe sitāre banā.e the

kuchh panchhiyoñ ne ghoñsle peḌoñ ke jhunD meñ

ūñchī jag.hoñ pe ḳhauf ke maare banā.e the

maiñ ne bas ek nahr nikālī thī haath se

dariyā ne aap apne kināre banā.e the

hasb-e-murād dast-e-hunar bolne lagā

gūñge ne chand aise ishāre banā.e the

kuchh zindagī ba-yād-e-azīzāñ zarūr thī

kuchh dost ham ne jaan se pyāre banā.e the

ham ne hayā pahan ke mohabbat-shi.ār kī

guḌiyoñ ke vāste bhī ġharāre banā.e the

dil meñ 'nasīm' husn kī takfīl ke liye

āñkhoñ ne kaise kaise idāre banā.e the

jis waqt us ne baKHt hamare banae the

hum ne hatheliyon pe sitare banae the

kuchh panchhiyon ne ghonsle peDon ke jhunD mein

unchi jaghon pe KHauf ke mare banae the

main ne bas ek nahr nikali thi hath se

dariya ne aap apne kinare banae the

hasb-e-murad dast-e-hunar bolne laga

gunge ne chand aise ishaare banae the

kuchh zindagi ba-yaad-e-azizan zarur thi

kuchh dost hum ne jaan se pyare banae the

hum ne haya pahan ke mohabbat-shiar ki

guDiyon ke waste bhi gharare banae the

dil mein 'nasim' husn ki takfil ke liye

aankhon ne kaise kaise idare banae the