جسے کالی رات نہ ڈس سکے جسے آسماں نہ ڈرا سکے

جسے کالی رات نہ ڈس سکے جسے آسماں نہ ڈرا سکے

کوئی ایسی شمع جلائیے جو ہوا سے آنکھ ملا سکے

میں نئی سحر کا نقیب ہوں مجھے فکر نفع و ضرر نہیں

مرے ساتھ محو سفر وہ ہو جو اجل کے ساز پہ گا سکے

مرے دست کو وہ ہنر عطا ہو ترے دیار کمال سے

جو دلوں میں عزم جگا سکے جو نظر میں پھول کھلا سکے

تو خیال و فکر سے ماورا تو سراپا راز ہی راز ہے

تری کھوج میں جو سدا رہے تری گرد کو بھی نہ پا سکے

وہ ہمیں تھے جو ترے نام پر سر دار ہنس کے گزر گئے

کسی فلسفی سے نہ بن پڑا نہ فقیہ وقت ہی جا سکے

ترے میکدے کا عجیب رسم و رواج ہے مرے ساقیا

کوئی رند جام لپک سکے نہ شراب منہ سے لگا سکے

یہ قضا و قدر کا کھیل ہے کہیں دھوپ ہے کہیں چھاؤں ہے

جسے تم نے چاہا وہ مل گیا جسے ہم نے چاہا نہ پا سکے

مرے ان کے بیچ تھیں دوریاں اے نیازؔ کیسی خبر نہیں

مجھے اپنے پاس بلا سکے نہ غریب خانے تک آ سکے