jise kali raat na Das sake jise aasman na Dara sake

jise kaalī raat na Das sake jise āsmāñ na Darā sake

koī aisī sham.a jalā.iye jo havā se aañkh milā sake

maiñ na.ī sahar kā naqīb huuñ mujhe fikr-e-naf-o-zarar nahīñ

mire saath mahv-e-safar vo ho jo ajal ke saaz pe gā sake

mire dast ko vo hunar atā ho tire dayār-e-kamāl se

jo diloñ meñ azm jagā sake jo nazar meñ phuul khilā sake

tū ḳhayāl-o-fikr se māvarā tū sarāpā raaz hī raaz hai

tirī khoj meñ jo sadā rahe tirī gard ko bhī na pā sake

vo hamīñ the jo tire naam par sar-e-dār hañs ke guzar ga.e

kisī falsafī se na ban paḌā na faqīh-e-vaqt hī jā sake

tire mai-kade kā ajiib rasm-o-rivāj hai mire sāqiyā

koī rind jaam lapak sake na sharāb muñh se lagā sake

ye qazā-o-qadr kā khel hai kahīñ dhuup hai kahīñ chhāñv hai

jise tum ne chāhā vo mil gayā jise ham ne chāhā na pā sake

mire un ke biich thiiñ dūriyāñ ai 'niyāz' kaisī ḳhabar nahīñ

mujhe apne paas bulā sake na ġharīb-ḳhāne tak aa sake

jise kali raat na Das sake jise aasman na Dara sake

koi aisi shama jalaiye jo hawa se aankh mila sake

main nai sahar ka naqib hun mujhe fikr-e-naf-o-zarar nahin

mere sath mahw-e-safar wo ho jo ajal ke saz pe ga sake

mere dast ko wo hunar ata ho tere dayar-e-kamal se

jo dilon mein azm jaga sake jo nazar mein phul khila sake

tu KHayal-o-fikr se mawara tu sarapa raaz hi raaz hai

teri khoj mein jo sada rahe teri gard ko bhi na pa sake

wo hamin the jo tere nam par sar-e-dar hans ke guzar gae

kisi falsafi se na ban paDa na faqih-e-waqt hi ja sake

tere mai-kade ka ajib rasm-o-riwaj hai mere saqiya

koi rind jam lapak sake na sharab munh se laga sake

ye qaza-o-qadr ka khel hai kahin dhup hai kahin chhanw hai

jise tum ne chaha wo mil gaya jise hum ne chaha na pa sake

mere un ke bich thin duriyan ai 'niyaz' kaisi KHabar nahin

mujhe apne pas bula sake na gharib-KHane tak aa sake