jism ke ghaar ke dahane par

jism ke ġhaar ke dahāne par

vo hī kirdār thā nishāne par

kyā muqābil thī ab ke bhī dīvār

koī bolā nahīñ bulāne par

ik ma.ānī ne aur dam toḌā

ain alfāz ke muhāne par

sā.ebāñ ke tale kahāñ rahtī

dhuup jā baiThī shāmiyāne par

vo bhī īmān tak chalā aayā

aa ga.e ham bhī muskurāne par

shor tanhā.iyāñ bhī kartī haiñ

ye khulā koī yaad aane par

rat-jagā dhuñdh ḳhvāb sargoshī

itne mehmāñ ġharīb-ḳhāne par

zaḳhm kā vo hī roz kā ronā

zabt kī zid bhī āzmāne par

laao nākāmiyoñ kā jaam idhar

ḳhaak Daalo bhī ab zamāna par

ḳhud ko ḳhud meñ sameT kar uThiye

aa ga.ī dhuup bhī sirhāne par

mutma.in aql kyoñ nahīñ āḳhir

lag gayā dil bhī jab Thikāne par

jism ke ghaar ke dahane par

wo hi kirdar tha nishane par

kya muqabil thi ab ke bhi diwar

koi bola nahin bulane par

ek maani ne aur dam toDa

ain alfaz ke muhane par

saeban ke tale kahan rahti

dhup ja baiThi shamiyane par

wo bhi iman tak chala aaya

aa gae hum bhi muskurane par

shor tanhaiyan bhi karti hain

ye khula koi yaad aane par

rat-jaga dhundh KHwab sargoshi

itne mehman gharib-KHane par

zaKHm ka wo hi roz ka rona

zabt ki zid bhi aazmane par

lao nakaamiyon ka jam idhar

KHak Dalo bhi ab zamana par

KHud ko KHud mein sameT kar uThiye

aa gai dhup bhi sirhane par

mutmain aql kyon nahin aaKHir

lag gaya dil bhi jab Thikane par