jism ki qaid mein hun kashmakash-e-zat mein hun

jism kī qaid meñ huuñ kashmakash-e-zāt meñ huuñ

ek sikke kī tarah kāsa-e-ḳhairāt meñ huuñ

tum se milne ke liye tum se judā hotā huuñ

kyā karūñ jān-e-vafā narġha-e-hālāt meñ huuñ

kal kā din kyoñ na rakheñ tark-e-ta.alluq ke liye

aaj kuchh maiñ bhī tumhārī tarah jazbāt meñ huuñ

kār-e-tesha bhī vahī hai mirā pesha bhī vahī

maiñ abhī daur-e-ġhulāmī hī ke hālāt meñ huuñ

zarre zarre mire uTh uTh ke qadam lene lage

vādī-e-qais meñ kuchh aise maqāmāt meñ huuñ

ab mirī samt koī aañkh uThātā bhī nahīñ

jab se dekhā hai tujhe maiñ bhī hijābāt meñ huuñ

parda-e-sher se bole hai mirā yaar 'sanā'

maiñ hī qur.ān meñ injīl meñ taurāt meñ hoñ

jism ki qaid mein hun kashmakash-e-zat mein hun

ek sikke ki tarah kasa-e-KHairaat mein hun

tum se milne ke liye tum se juda hota hun

kya karun jaan-e-wafa nargha-e-haalat mein hun

kal ka din kyon na rakhen tark-e-talluq ke liye

aaj kuchh main bhi tumhaari tarah jazbaat mein hun

kar-e-tesha bhi wahi hai mera pesha bhi wahi

main abhi daur-e-ghulami hi ke haalat mein hun

zarre zarre mere uTh uTh ke qadam lene lage

wadi-e-qais mein kuchh aise maqamat mein hun

ab meri samt koi aankh uThata bhi nahin

jab se dekha hai tujhe main bhi hijabaat mein hun

parda-e-sher se bole hai mera yar 'sana'

main hi quran mein injil mein tauraat mein hon