جسم میرا تھا مگر سایا کسی اور کا تھا

جسم میرا تھا مگر سایا کسی اور کا تھا

میرے چہرے کی جگہ چہرہ کسی اور کا تھا

ہو کے اک شخص کا میں ہوتا رہا ایک سے دور

میں کسی کا تھا مجھے ہونا کسی اور کا تھا

سب کے حصے کا میسر تھا میں سب کو لیکن

میری ہر سانس پہ حق پہلا کسی اور کا تھا

یاد کے شہر میں پہچانے سے در پر میں نے

دستکیں دیں پہ وہ دروازہ کسی اور کا تھا

اب کے پہلے سی نہ تھی لفظوں میں اشکوں کی نمی

شعر میرا تھا مگر لہجہ کسی اور کا تھا