jism-o-jaan rakhta hun lekin ye hawala kuchh nahin

jism-o-jāñ rakhtā huuñ lekin ye havāla kuchh nahīñ

aap kī nisbat hai sab kuchh merā apnā kuchh nahīñ

ishq jis kūche meñ rahtā hai vo kūcha hai bahisht

aql jis duniyā meñ rahtī hai vo duniyā kuchh nahīñ

kitne sāda-lauh the agle zamāne ke vo log

kah diyā jo dil meñ aayā dil meñ rakkhā kuchh nahīñ

dekhne vaalā koī hotā to ham bhī khelte

the tamāshe saikḌoñ lekin dikhāyā kuchh nahīñ

aa ke jo sairāb kartī hai zamīn-e-ḳhushk ko

asl meñ hai mauj-e-dariyā shor-e-dariyā kuchh nahīñ

is taraf hai merī vahshat us taraf terā jamāl

vo haqīqat dā.imī hai ye tamāshā kuchh nahīñ

jaane kis kī justujū meñ thī hayāt-e-muḳhtasar

umr-bhar bhāgā kiye aur haath aayā kuchh nahīñ

ye hasīñ manzar ye bahr-o-bar ye sab māh-o-nujūm

terī qudrat kā karishma haiñ kisī kā kuchh nahīñ

pesh karnā hai to us ko pesh kiije dil 'ziyā'

yaar kī nazroñ meñ duniyā kā asāsa kuchh nahīñ

jism-o-jaan rakhta hun lekin ye hawala kuchh nahin

aap ki nisbat hai sab kuchh mera apna kuchh nahin

ishq jis kuche mein rahta hai wo kucha hai bahisht

aql jis duniya mein rahti hai wo duniya kuchh nahin

kitne sada-lauh the agle zamane ke wo log

kah diya jo dil mein aaya dil mein rakkha kuchh nahin

dekhne wala koi hota to hum bhi khelte

the tamashe saikDon lekin dikhaya kuchh nahin

aa ke jo sairab karti hai zamin-e-KHushk ko

asl mein hai mauj-e-dariya shor-e-dariya kuchh nahin

is taraf hai meri wahshat us taraf tera jamal

wo haqiqat daimi hai ye tamasha kuchh nahin

jaane kis ki justuju mein thi hayat-e-muKHtasar

umr-bhar bhaga kiye aur hath aaya kuchh nahin

ye hasin manzar ye bahr-o-bar ye sab mah-o-nujum

teri qudrat ka karishma hain kisi ka kuchh nahin

pesh karna hai to us ko pesh kije dil 'ziya'

yar ki nazron mein duniya ka asasa kuchh nahin