jism par apne jab qaba hi nahin

jism par apne jab qabā hī nahīñ

āstīnoñ kā mas.ala hī nahīñ

ab kahānī hue adab ādāb

ghar se niklūñ ye hausla hī nahīñ

tark tāḳhīr 'uzr sahv qazā

dil ke mashrab meñ ye ravā hī nahīñ

pahle galiyāñ bhī Tok detī thiiñ

ab to ghar ko bhī vāsta hī nahīñ

chehra chehra ġhubār-ālūda

aa.ina koī aa.ina hī nahīñ

jahl meñ e'timād thā itnā

'ilm ne aage kuchh kahā hī nahīñ

'umr bhar jo kiyā na karnā thā

aur jo karnā thā vo kiyā hī nahīñ

'ishq meñ jaan jā bhī saktī hai

kaisā pāgal hai sochtā hī nahīñ

ab to sar se guzar gayā paanī

kahne sunñe ko kuchh bachā hī nahīñ

zo'm itnā jo iḳhtiyār pe hai

kyā samajhte ho tum ḳhudā hī nahīñ

do hī din meñ sañbhal ga.ī duniyā

jaise 'vāhid-nazīr' thā hī nahīñ

jism par apne jab qaba hi nahin

aastinon ka masala hi nahin

ab kahani hue adab aadab

ghar se niklun ye hausla hi nahin

tark taKHir 'uzr sahw qaza

dil ke mashrab mein ye rawa hi nahin

pahle galiyan bhi Tok deti thin

ab to ghar ko bhi wasta hi nahin

chehra chehra ghubar-aluda

aaina koi aaina hi nahin

jahl mein e'timad tha itna

'ilm ne aage kuchh kaha hi nahin

'umr bhar jo kiya na karna tha

aur jo karna tha wo kiya hi nahin

'ishq mein jaan ja bhi sakti hai

kaisa pagal hai sochta hi nahin

ab to sar se guzar gaya pani

kahne sunne ko kuchh bacha hi nahin

zo'm itna jo iKHtiyar pe hai

kya samajhte ho tum KHuda hi nahin

do hi din mein sanbhal gai duniya

jaise 'wahid-nazir' tha hi nahin