jism se rahguzar banate hain

jism se rahguzar banāte haiñ

aa mohabbat ko shar banāte haiñ

sirf dīvār-o-dar banāte haiñ

aur da.avā hai ghar banāte haiñ

ḳhud ko bār-e-digar banāte haiñ

aur ab soch kar banāte haiñ

aaj lakḌī ke joḌ kar taḳhte

Duub jaane kā Dar banāte haiñ

jin ke paañv vo kaaT lete haiñ

un ke jismoñ pe sar banāte haiñ

ye luTere hī mere mohsin haiñ

band galiyoñ meñ dar banāte haiñ

us ne uḌnā hai aur samtoñ meñ

aa.iye bāl-o-par banāte haiñ

ham ne jaanā nahīñ kahīñ bhī tū

kyoñ ye rāh-e-safar banāte haiñ

ab 'sabāhat' ḳhudā bane haiñ vo

ab vo shams-o-qamar banāte haiñ

jism se rahguzar banate hain

aa mohabbat ko shar banate hain

sirf diwar-o-dar banate hain

aur dawa hai ghar banate hain

KHud ko bar-e-digar banate hain

aur ab soch kar banate hain

aaj lakDi ke joD kar taKHte

Dub jaane ka Dar banate hain

jin ke panw wo kaT lete hain

un ke jismon pe sar banate hain

ye luTere hi mere mohsin hain

band galiyon mein dar banate hain

us ne uDna hai aur samton mein

aaiye baal-o-par banate hain

hum ne jaana nahin kahin bhi tu

kyon ye rah-e-safar banate hain

ab 'sabahat' KHuda bane hain wo

ab wo shams-o-qamar banate hain