jitna dikhta hun mujhe us se ziyaada na samajh

jitnā dikhtā huuñ mujhe us se ziyāda na samajh

is zamīñ kā huuñ mujhe koī farishta na samajh

ye tirī aañkh ke dhoke ke sivā kuchh bhī nahīñ

ek bahte hue dariyā ko kinārā na samajh

chhoḌ jā.egā tirā saath añdhere meñ yahī

ye jo saaya hai tirā is ko bhī apnā na samajh

jin kitāboñ ne añdheroñ ke sivā kuchh na diyā

un kitāboñ ke ujāloñ ko ujālā na samajh

ye jo biphrā to Dubo.egā safīne kitne

tū ise aañkh se Tapkā huā qatra na samajh

vo tujhe bāñTne aayā hai ka.ī TukḌoñ meñ

muskurāte hue shaitāñ ko masīhā na samajh

tujh se hī maañg rahā hai vo to ḳhud apnā vajūd

ḳhud jo saa.il hai use koī ḳhalīfa na samajh

hai tire saath agar tere irādoñ kā junūn

qāfila hai tū kabhī ḳhud ko akelā na samajh

saath haiñ mere buzurgoñ kī duā.eñ itnī

maiñ huuñ mahfil tū mujhe pal ko bhī tanhā na samajh

jitna dikhta hun mujhe us se ziyaada na samajh

is zamin ka hun mujhe koi farishta na samajh

ye teri aankh ke dhoke ke siwa kuchh bhi nahin

ek bahte hue dariya ko kinara na samajh

chhoD jaega tera sath andhere mein yahi

ye jo saya hai tera is ko bhi apna na samajh

jin kitabon ne andheron ke siwa kuchh na diya

un kitabon ke ujalon ko ujala na samajh

ye jo biphra to Duboega safine kitne

tu ise aankh se Tapka hua qatra na samajh

wo tujhe banTne aaya hai kai TukDon mein

muskuraate hue shaitan ko masiha na samajh

tujh se hi mang raha hai wo to KHud apna wajud

KHud jo sail hai use koi KHalifa na samajh

hai tere sath agar tere iradon ka junun

qafila hai tu kabhi KHud ko akela na samajh

sath hain mere buzurgon ki duaen itni

main hun mahfil tu mujhe pal ko bhi tanha na samajh