jitne din ka sath likha tha sat rahe

jitne din kā saath likhā thā saat rahe

ab kuchh din to āñkhoñ meñ barsāt rahe

ab nā-shukrī karnā aur mo.āmla hai

hāsil ham ko ishq rahā samrāt rahe

andar kī devī ne ye chumkār kahā

narm hai dil to kaahe lahja dhaat rahe

tum vaise ke vaise ho to lā-yānī

maanā qurbānī bhī kī arfāt rahe

ek akele shaḳhs kā kaam nahīñ lagtā

shāmil us ke saath ka.ī jinnāt rahe

ek bhī dil jo tum tasḳhīr na kar paa.e

kyā paayā jo hāsil kā.enāt rahe

ham the bechainī ke halqe aur sukūt

din meñ thoḌī chhūT milī to raat rahe

shāhoñ kī shah-ḳharchī kam na ho paa.ī

ham jaisoñ ke jaise the hālāt rahe

'hasrat' in āñkhoñ meñ chashme phuuT paḌe

jitnā chup rah sakte the jazbāt rahe

jitne din ka sath likha tha sat rahe

ab kuchh din to aankhon mein barsat rahe

ab na-shukri karna aur moamla hai

hasil hum ko ishq raha samraat rahe

andar ki dewi ne ye chumkar kaha

narm hai dil to kahe lahja dhat rahe

tum waise ke waise ho to la-yani

mana qurbani bhi ki arfat rahe

ek akele shaKHs ka kaam nahin lagta

shamil us ke sath kai jinnat rahe

ek bhi dil jo tum tasKHir na kar pae

kya paya jo hasil kaenat rahe

hum the bechaini ke halqe aur sukut

din mein thoDi chhuT mili to raat rahe

shahon ki shah-KHarchi kam na ho pai

hum jaison ke jaise the haalat rahe

'hasrat' in aankhon mein chashme phuT paDe

jitna chup rah sakte the jazbaat rahe