جتنے ضروری کام ہیں وہ کل پہ ٹال کر

جتنے ضروری کام ہیں وہ کل پہ ٹال کر

بیٹھے ہیں ان کے سامنے دل کو سنبھال کر

اس کو بھی مشکلوں کا کوئی ڈر نہیں ہے اور

کرتا ہوں میں بھی فیصلہ سکہ اچھال کر

تعبیر خواب ہو نہ سکا خواب ہی تو تھا

اب بھول جا اب اور نہ اس کا ملال کر

میں خوش نہیں ہوں تجھ سے بچھڑ کر مرے حبیب

تو خوش ہے ایک بار یہ خود سے سوال کر

اب مجھ میں اور لڑنے کی ہمت نہیں رہی

اے زندگی اب اور نہ مجھ کو نڈھال کر

نیرجؔ انا تو ٹھیک مراسم نہ ترک ہو

جو کچھ ہوا وہ بھول کے رشتہ بحال کر