jitne zaruri kaam hain wo kal pe Tal kar

jitne zarūrī kaam haiñ vo kal pe Taal kar

baiThe haiñ un ke sāmne dil ko sañbhāl kar

us ko bhī mushkiloñ kā koī Dar nahīñ hai aur

kartā huuñ maiñ bhī faisla sikka uchhāl kar

tābīr-e-ḳhvāb ho na sakā ḳhvāb hī to thā

ab bhuul jā ab aur na us kā malāl kar

maiñ ḳhush nahīñ huuñ tujh se bichhaḌ kar mire habīb

tū ḳhush hai ek baar ye ḳhud se savāl kar

ab mujh meñ aur laḌne kī himmat nahīñ rahī

ai zindagī ab aur na mujh ko nidhāl kar

'nīraj' anā to Thiik marāsim na tark ho

jo kuchh huā vo bhuul ke rishta bahāl kar

jitne zaruri kaam hain wo kal pe Tal kar

baiThe hain un ke samne dil ko sanbhaal kar

us ko bhi mushkilon ka koi Dar nahin hai aur

karta hun main bhi faisla sikka uchhaal kar

tabir-e-KHwab ho na saka KHwab hi to tha

ab bhul ja ab aur na us ka malal kar

main KHush nahin hun tujh se bichhaD kar mere habib

tu KHush hai ek bar ye KHud se sawal kar

ab mujh mein aur laDne ki himmat nahin rahi

ai zindagi ab aur na mujh ko nidhaal kar

'niraj' ana to Thik marasim na tark ho

jo kuchh hua wo bhul ke rishta bahaal kar