jo aai KHushbu kabhi tere pairahan ki tarah

jo aa.ī ḳhushbū kabhī tere pairahan kī tarah

gulāb jalne lage haiñ mire badan kī tarah

ye tere nāz-o-adā terī shoḳhī-o-shangī

haiñ dil-fareb bahut tere bāñkpan kī tarah

junūñ ko raas to aa.ī sukūnat-e-sahrā

kahāñ vo lutf magar terī anjuman kī tarah

haiñ gul hazāroñ shagufta chaman chaman lekin

kahāñ vo nik.hat-e-gul zaḳhm-e-jān-o-tan kī tarah

bahār chuum ke aa.ī hai terī zulf kahīñ

gulāb mahke haiñ ab ke tire badan kī tarah

nahīñ hai tāb-e-nazāra isī liye shāyad

vo ruḳh pe zulf sajā lete haiñ gahan kī tarah

na chhū ke aa.ī agar tere jism kī ḳhushbū

sabā hai mushk-bū kyuuñ āhū-e-ḳhutan kī tarah

na zikr-e-qais kahīñ hai na nisbat-e-farhād

badal ga.ī hai mohabbat bhī fikr-o-fan kī tarah

kahāñ kahāñ ho rafū chāragar se ab 'ḳhāvar'

jigar bhī chaak huā jaa.e pairahan kī tarah

jo aai KHushbu kabhi tere pairahan ki tarah

gulab jalne lage hain mere badan ki tarah

ye tere naz-o-ada teri shoKHi-o-shangi

hain dil-fareb bahut tere bankpan ki tarah

junun ko ras to aai sukunat-e-sahra

kahan wo lutf magar teri anjuman ki tarah

hain gul hazaron shagufta chaman chaman lekin

kahan wo nikhat-e-gul zaKHm-e-jaan-o-tan ki tarah

bahaar chum ke aai hai teri zulf kahin

gulab mahke hain ab ke tere badan ki tarah

nahin hai tab-e-nazara isi liye shayad

wo ruKH pe zulf saja lete hain gahan ki tarah

na chhu ke aai agar tere jism ki KHushbu

saba hai mushk-bu kyun aahu-e-KHutan ki tarah

na zikr-e-qais kahin hai na nisbat-e-farhad

badal gai hai mohabbat bhi fikr-o-fan ki tarah

kahan kahan ho rafu chaaragar se ab 'KHawar'

jigar bhi chaak hua jae pairahan ki tarah