جو آئنے میں نظر تجھ کو آ رہا ہوگا

جو آئنے میں نظر تجھ کو آ رہا ہوگا

وہ دیکھنا پس آئینہ بھی چھپا ہوگا

ہنسی کا جس نے لبادہ لبوں پہ اوڑھا ہے

اسے ضرور کوئی زخم بھی ملا ہوگا

سفیر عشق کبھی دیکھ جا کے مقتل میں

سناں کی نوک پہ واں عشق بھی دھرا ہوگا

جلاؤ دل کے دیے وحشتوں کے عالم میں

شب فراق یہی ایک آسرا ہوگا

میں در پہ روز ہی تکتی ہوں راہ قاصد کی

یہ سوچ کر کہ مجھے اس نے خط لکھا ہوگا

خبر کہاں ہے یہ ہم کاروان صحرا کو

کہ جس کو سمجھے ہیں منزل وہ راستہ ہوگا

میں سو سکی نہ کبھی ریشماںؔ سکون کے ساتھ

یہ سوچ کر کہ کہیں وہ بھی جاگتا ہوگا