jo aaine mein nazar tujhko aa raha hoga

jo aa.ine meñ nazar tujh ko aa rahā hogā

vo dekhnā pas-e-ā.īna bhī chhupā hogā

hañsī kā jis ne labāda laboñ pe oḌhā hai

use zarūr koī zaḳhm bhī milā hogā

safīr-e-ishq kabhī dekh jā ke maqtal meñ

sināñ kī nok pe vaañ 'ishq bhī dharā hogā

jalāo dil ke diye vahshatoñ ke 'ālam meñ

shab-e-firāq yahī ek aasrā hogā

maiñ dar pe roz hī taktī huuñ raah qāsid kī

ye soch kar ki mujhe us ne ḳhat likhā hogā

ḳhabar kahāñ hai ye ham kārvān-e-sahrā ko

ki jis ko samjhe haiñ manzil vo rāsta hogā

maiñ so sakī na kabhī 'reshmāñ' sukūn ke saath

ye soch kar ki kahīñ vo bhī jāgtā hogā

jo aaine mein nazar tujh ko aa raha hoga

wo dekhna pas-e-aina bhi chhupa hoga

hansi ka jis ne labaada labon pe oDha hai

use zarur koi zaKHm bhi mila hoga

safir-e-ishq kabhi dekh ja ke maqtal mein

sinan ki nok pe wan 'ishq bhi dhara hoga

jalao dil ke diye wahshaton ke 'alam mein

shab-e-firaq yahi ek aasra hoga

main dar pe roz hi takti hun rah qasid ki

ye soch kar ki mujhe us ne KHat likha hoga

KHabar kahan hai ye hum karwan-e-sahra ko

ki jis ko samjhe hain manzil wo rasta hoga

main so saki na kabhi 'reshman' sukun ke sath

ye soch kar ki kahin wo bhi jagta hoga