jo aansuon ko na chamkae wo KHushi kya hai

jo āñsuoñ ko na chamkā.e vo ḳhushī kyā hai

na aa.e maut pe ġhālib to zindagī kyā hai

hameñ ḳhabar hai na apnī na ahl-e-duniyā kī

koī batā.e ye andāz-e-be-ḳhudī kyā hai

maiñ saath detā huuñ yāroñ kā hadd-e-manzil tak

maiñ jāntā nahīñ dastūr-e-rah-ravī kyā hai

tire ḳhayāl meñ din-rāt mast rahtā huuñ

ye bandagī jo nahīñ hai to bandagī kyā hai

tire karam se mayassar hai daulat-e-kaunain

tirā karam hai jabhī tak mujhe kamī kyā hai

na.e purāne nasheman sabhī jalā kar ab

nigāh-e-barq khaḌī duur tāktī kyā hai

kisī kī chashm-e-karam aap par nahīñ to kyuuñ

ye ḳhud se pochhiye kirdār meñ kamī kyā hai

na aa.ī jāgtī āñkhoñ ke dā.ere meñ kabhī

ye bad-nasīb kā ik ḳhvāb hai ḳhushī kyā hai

jo baat kahtā huuñ karte haiñ us pe harf-zanī

ye dostī hai to andāz-e-dushmanī kyā hai

qadam qadam pe kiye 'charḳh' zindagī ne mazāq

samajh meñ aa na sakā qasd-e-zindagī kyā hai

jo aansuon ko na chamkae wo KHushi kya hai

na aae maut pe ghaalib to zindagi kya hai

hamein KHabar hai na apni na ahl-e-duniya ki

koi batae ye andaz-e-be-KHudi kya hai

main sath deta hun yaron ka hadd-e-manzil tak

main jaanta nahin dastur-e-rah-rawi kya hai

tere KHayal mein din-raat mast rahta hun

ye bandagi jo nahin hai to bandagi kya hai

tere karam se mayassar hai daulat-e-kaunain

tera karam hai jabhi tak mujhe kami kya hai

nae purane nasheman sabhi jala kar ab

nigah-e-barq khaDi dur takti kya hai

kisi ki chashm-e-karam aap par nahin to kyun

ye KHud se pochhiye kirdar mein kami kya hai

na aai jagti aankhon ke daere mein kabhi

ye bad-nasib ka ek KHwab hai KHushi kya hai

jo baat kahta hun karte hain us pe harf-zani

ye dosti hai to andaz-e-dushmani kya hai

qadam qadam pe kiye 'charKH' zindagi ne mazaq

samajh mein aa na saka qasd-e-zindagi kya hai