جو ادا دل کشا نہیں ہوتی

جو ادا دل کشا نہیں ہوتی

کچھ بھی ہو وہ ادا نہیں ہوتی

یہ ہے اپنی پسند پر موقوف

جان سب پر فدا نہیں ہوتی

وہ کلی خار سے بھی بد تر ہے

جس میں بوئے وفا نہیں ہوتی

حسن کے دل پہ ہو اثر جس کا

ایسی کوئی دعا نہیں ہوتی

وہ سزا دے رہے ہیں یہ کہہ کر

کیا محبت خطا نہیں ہوتی

جو ملے حسن کی عدالت سے

در حقیقت سزا نہیں ہوتی

ان سے کہہ دو کہ بے نقاب نہ ہوں

ہر نظر پارسا نہیں ہوتی

یہ محبت ہے اس کے پردے میں

ظلم کی انتہا نہیں ہوتی

آپ کہتے ہیں ناروا تو کہیں

عرض غم ناروا نہیں ہوتی