جو اپنی چھوٹی آنکھوں میں بڑے سپنے سجائیں گے

جو اپنی چھوٹی آنکھوں میں بڑے سپنے سجائیں گے

وہ ان کے ٹوٹنے کا بعد میں ماتم منائیں گے

نہ کر تو فکر تیرے بعد اس دنیا کا کیا ہوگا

تجھے کچھ روز میں ہی دنیا والے بھول جائیں گے

مجھے خاموش کر کے ہو رہا ہے خوش مگر سن لے

مرے قصے جہاں والے سنیں گے اور سنائیں گے

اجالا بیچنے وہ آ گئے ہیں آج بستی میں

جو کل کہہ کر گئے تھے ہم اندھیروں کو مٹائیں گے

پڑا ہے آج مٹی کے تلے ان کا بدن عاطفؔ

جو دعویٰ کرتے تھے ہم مٹی کو سونا بنائیں گے