jo ashk dil pe gire wo shumar kar na saki

jo ashk dil pe gire vo shumār kar na sakī

maiñ us ke jazboñ ko dil pe savār kar na sakī

vo kar rahā thā baġhāvat pe mujh ko āmāda

magar qabīle kī izzat pe vaar kar na sakī

vo sabz baaġh dikhātā thā mujh ko va.adoñ ke

ye aañkh us pe magar inhisār kar na sakī

bichhaḌ ke tujh se mirī ḳhud se jañg jaarī rahī

maiñ dil kī duniyā kabhī sāzgār kar na sakī

vo mere saath hai ham-zād kī tarah 'aiman'

maiñ jis pe hālat-e-dil āshkār kar na sakī

jo ashk dil pe gire wo shumar kar na saki

main us ke jazbon ko dil pe sawar kar na saki

wo kar raha tha baghawat pe mujh ko aamada

magar qabile ki izzat pe war kar na saki

wo sabz bagh dikhata tha mujh ko wadon ke

ye aankh us pe magar inhisar kar na saki

bichhaD ke tujh se meri KHud se jang jari rahi

main dil ki duniya kabhi sazgar kar na saki

wo mere sath hai ham-zad ki tarah 'aiman'

main jis pe haalat-e-dil aashkar kar na saki