جو ازل ہی سے مقفل ہے وہ گھر کھولے گا

جو ازل ہی سے مقفل ہے وہ گھر کھولے گا

آج وہ میرے لیے ساتواں در کھولے گا

ڈھونڈھتا ہے جو بہر گام نئی راہ یہاں

وہ مسافر بھی کبھی رخت سفر کھولے گا

سبز پتوں کی قبا کس نے ہے چھینی اس سے

اک نہ اک روز یہ عقدہ تو شجر کھولے گا

اس کی قسمت پہ سبھی رشک تو کرتے ہیں مگر

کتنے پانی میں صدف ہے یہ گہر کھولے گا

ایک مدت سے جو بیٹھا ہے سمٹ کر خود میں

وہ پرندہ بھی ہوا دیکھ کے پر کھولے گا

موم کی طرح پگھل جائیں گے پتھر کتنے

ایک فن کار جہاں دست ہنر کھولے گا

راز ہستی بھی کسی روز یہاں پر نوشادؔ

دیکھنا مجھ سا کوئی خاک بسر کھولے گا