jo azal hi se muqaffal hai wo ghar kholega

jo azal hī se muqaffal hai vo ghar kholegā

aaj vo mere liye sātvāñ dar kholegā

DhūñDhtā hai jo bahar-gām na.ī raah yahāñ

vo musāfir bhī kabhī raḳht-e-safar kholegā

sabz pattoñ kī qabā kis ne hai chhīnī us se

ik-na-ik roz ye uqda to shajar kholegā

us kī qismat pe sabhī rashk to karte haiñ magar

kitne paanī meñ sadaf hai ye guhar kholegā

ek muddat se jo baiThā hai simaT kar ḳhud meñ

vo parinda bhī havā dekh ke par kholegā

mom kī tarah pighal jā.eñge patthar kitne

ek fankār jahāñ dast-e-hunar kholegā

rāz-e-hastī bhī kisī roz yahāñ par 'naushād'

dekhnā mujh sā koī ḳhāk-basar kholegā

jo azal hi se muqaffal hai wo ghar kholega

aaj wo mere liye satwan dar kholega

DhunDhta hai jo bahar-gam nai rah yahan

wo musafir bhi kabhi raKHt-e-safar kholega

sabz patton ki qaba kis ne hai chhini us se

ik-na-ik roz ye uqda to shajar kholega

us ki qismat pe sabhi rashk to karte hain magar

kitne pani mein sadaf hai ye guhar kholega

ek muddat se jo baiTha hai simaT kar KHud mein

wo parinda bhi hawa dekh ke par kholega

mom ki tarah pighal jaenge patthar kitne

ek fankar jahan dast-e-hunar kholega

raaz-e-hasti bhi kisi roz yahan par 'naushad'

dekhna mujh sa koi KHak-basar kholega