جو با کمال تھے ان پر زوال آ ہی گیا

جو با کمال تھے ان پر زوال آ ہی گیا

فلک پہ اڑتے پرندوں پہ جال آ ہی گیا

خزاں سے گلشن ہستی اجڑ گیا لیکن

زمیں پہ پھول کھلے اور جمال آ ہی گیا

اگرچہ ظلم کے پہرے تھے حرف گویا پر

اسیر جبر کے لب پر سوال آ ہی گیا

وقوف جہل سے بعد از خرابئ‌ بسیار

شعور ذات کا آخر خیال آ ہی گیا

مثال گل جو مہکتا تھا ذکر جاناں سے

وبال ہجر سے دل میں ملال آ ہی گیا

تمام عمر جو حسن گریز پا ٹھہرا

مگر خیال میں اس کا خیال آ ہی گیا

وہ جس کا ذکر بزرگوں سے سنتے تھے راہیؔ

غضب خدا کا وہ قحط‌ الرجال آ ہی گیا