jo ba-kamal the un par zawal aa hi gaya

jo bā-kamāl the un par zavāl aa hī gayā

falak pe uḌte parindoñ pe jaal aa hī gayā

ḳhizāñ se gulshan-e-hastī ujaḌ gayā lekin

zamīñ pe phuul khile aur jamāl aa hī gayā

agarche zulm ke pahre the harf-e-goyā par

asīr-e-jabr ke lab par savāl aa hī gayā

vuqūf-e-jahl se bā’d-az-ḳharābi-e-bisyār

shu'ūr-e-zāt kā āḳhir ḳhayāl aa hī gayā

misāl-e-gul jo mahaktā thā zikr-e-jānāñ se

vabāl-e-hijr se dil meñ malāl aa hī gayā

tamām 'umr jo husn-e-gurez-pā Thahrā

magar ḳhayāl meñ us kā ḳhayāl aa hī gayā

vo jis kā zikr buzurgoñ se sunte the 'rāhī'

ġhazab ḳhudā kā vo qaht-ur-rijāl aa hī gayā

jo ba-kamal the un par zawal aa hi gaya

falak pe uDte parindon pe jal aa hi gaya

KHizan se gulshan-e-hasti ujaD gaya lekin

zamin pe phul khile aur jamal aa hi gaya

agarche zulm ke pahre the harf-e-goya par

asir-e-jabr ke lab par sawal aa hi gaya

wuquf-e-jahl se ba’d-az-KHarabi-e-bisyar

shu'ur-e-zat ka aaKHir KHayal aa hi gaya

misal-e-gul jo mahakta tha zikr-e-jaanan se

wabaal-e-hijr se dil mein malal aa hi gaya

tamam 'umr jo husn-e-gurez-pa Thahra

magar KHayal mein us ka KHayal aa hi gaya

wo jis ka zikr buzurgon se sunte the 'rahi'

ghazab KHuda ka wo qaht-ur-rijal aa hi gaya