جو بات کام کی ہے ہنس کے ٹال دیتا ہے

جو بات کام کی ہے ہنس کے ٹال دیتا ہے

فضول بات کو اکثر اچھال دیتا ہے

طلوع غروب عروج و زوال دیتا ہے

کسی کو تمغہ کسی کو وہ شال دیتا ہے

تغیرات کے سانچوں میں ڈھال دیتا ہے

خوشی کلی کو تو گل کو ملال دیتا ہے

وہ چار سمت کا دریا بہا کے عالم میں

کسی کو غرب کسی کو شمال دیتا ہے

مچھیرا کتنی فراست سے جال کو اپنی

اٹھا کے گہرے سمندر میں ڈال دیتا ہے

ہر ایک کام کو وہ میرے رائیگاں لکھ کر

پہاڑ کھود کے چوہا نکال دیتا ہے

کبھی کبھی مجھے لمس وصال دے کے ضررؔ

مرے وجود کو برسوں اجال دیتا ہے