jo baat rahe dil mein wahi baat baDi hai

jo baat rahe dil meñ vahī baat baḌī hai

ulfat kā taqāzā bhī yahī kam-suḳhanī hai

saaqī tirī āñkhoñ meñ haiñ do-jām chhalakte

mai-ḳhāne kī mastī tirī āñkhoñ meñ bharī hai

fankār ne jab apnā qalam ġham meñ Duboyā

tab jā ke tire husn kī tasvīr banī hai

jab chāhā tujhe dekh liyā jān-e-tamannā

ġham-ḳhāna-e-dil meñ tirī tasvīr juḌī hai

kyoñ sub.h nahīñ hotī mirī shām-e-alam kī

kyoñ ziist mirī maut ke sāñche meñ Dhalī hai

jis vaqt nazar aayā tirī zulf kā saaya

us vaqt kahā dil ne yahāñ chhāñv ghanī hai

tauhīn na kar is kī ise kah le mai-e-nāb

nāseh mire sāġhar meñ to shīshe kī parī hai

ye vaqt-e-javānī hai gañvā is ko na 'hamdam'

nādān ibārat ke liye umr paḌī hai

jo baat rahe dil mein wahi baat baDi hai

ulfat ka taqaza bhi yahi kam-suKHani hai

saqi teri aankhon mein hain do-jam chhalakte

mai-KHane ki masti teri aankhon mein bhari hai

fankar ne jab apna qalam gham mein Duboya

tab ja ke tere husn ki taswir bani hai

jab chaha tujhe dekh liya jaan-e-tamanna

gham-KHana-e-dil mein teri taswir juDi hai

kyon subh nahin hoti meri sham-e-alam ki

kyon zist meri maut ke sanche mein Dhali hai

jis waqt nazar aaya teri zulf ka saya

us waqt kaha dil ne yahan chhanw ghani hai

tauhin na kar is ki ise kah le mai-e-nab

naseh mere saghar mein to shishe ki pari hai

ye waqt-e-jawani hai ganwa is ko na 'hamdam'

nadan ibarat ke liye umr paDi hai