jo bahar-e-watan marne ko tayyar nahin hai

jo bahar-e-vatan marne ko tayyār nahīñ hai

jiine kā kisī taur vo haqdār nahīñ hai

kyā fā.eda is shikva-o-faryād-o-fuġhāñ se

sunñe ko jise koī bhī tayyār nahīñ hai

vaa.iz se kaho jā ke kare va.az kahīñ aur

koī bhī to is bazm meñ hushiyār nahīñ hai

karnī hai bapā phir mujhe ik shorish-e-daurāñ

ai dosto naala mirā be-kār nahīñ hai

jis jā pe baseñ ġhairat-e-millī ke muhāfiz

jannat hai vo zindān kī dīvār nahīñ hai

bhaḌkeñge abhī aur bhī jazbāt ke sho.ale

ātish ye tah-e-ḳhāk hai bedār nahīñ hai

'bismil' ne ishāroñ meñ kahī dil kī kahānī

bharpūr javānī kī ye guftār nahīñ hai

jo bahar-e-watan marne ko tayyar nahin hai

jine ka kisi taur wo haqdar nahin hai

kya faeda is shikwa-o-faryaad-o-fughan se

sunne ko jise koi bhi tayyar nahin hai

waiz se kaho ja ke kare waz kahin aur

koi bhi to is bazm mein hushiyar nahin hai

karni hai bapa phir mujhe ek shorish-e-dauran

ai dosto nala mera be-kar nahin hai

jis ja pe basen ghairat-e-milli ke muhafiz

jannat hai wo zindan ki diwar nahin hai

bhaDkenge abhi aur bhi jazbaat ke shoale

aatish ye tah-e-KHak hai bedar nahin hai

'bismil' ne ishaaron mein kahi dil ki kahani

bharpur jawani ki ye guftar nahin hai