jo bazm-e-dahr mein kal tak the KHud-suron ki tarah

jo bazm-e-dahr meñ kal tak the ḳhud-suroñ kī tarah

bikhar ga.e haiñ vo TuuTe hue paroñ kī tarah

shikasta ruuh hai jismoñ ke gumbadoñ meñ asiir

haiñ mere daur ke insān maqbaroñ kī tarah

Daro tum un se ki vo rāz-dār-e-tūfāñ haiñ

jo ek umr se chup haiñ samundaroñ kī tarah

paḌā jo vaqt to vo phir nazar nahīñ aa.e

yaqīñ kareñ ki jo milte the dilbaroñ kī tarah

haqīqatoñ kā kareñ sāmnā dilerī se

na ye ki muuñd leñ āñkheñ kabūtaroñ kī tarah

jo bazm-e-dahr mein kal tak the KHud-suron ki tarah

bikhar gae hain wo TuTe hue paron ki tarah

shikasta ruh hai jismon ke gumbadon mein asir

hain mere daur ke insan maqbaron ki tarah

Daro tum un se ki wo raaz-dar-e-tufan hain

jo ek umr se chup hain samundaron ki tarah

paDa jo waqt to wo phir nazar nahin aae

yaqin karen ki jo milte the dilbaron ki tarah

haqiqaton ka karen samna dileri se

na ye ki mund len aankhen kabutaron ki tarah