jo be-sabaat ho us sarKHushi ko kya kije

jo be-sabāt ho us sarḳhushī ko kyā kiije

ye zindagī hai to phir zindagī ko kyā kiije

rukā jo kaam to dīvāngī hī kaam aa.ī

na kaam aa.e to farzāngī ko kyā kiije

ye kyuuñ kaheñ ki hameñ koī rahnumā na milā

magar sarisht kī āvārgī ko kyā kiije

kisī ko dekh ke ik mauj lab pe aa to ga.ī

uThe na dil se to aisī hañsī ko kyā kiije

hameñ to aap ne soz-e-alam hī baḳhshā thā

jo nuur ban ga.ī us tīrgī ko kyā kiije

hamāre hisse kā ik jur.a bhī nahīñ baaqī

nigāh-e-dost kī mai-ḳhāngī ko kyā kiije

jahāñ ġharīb ko nān-e-javīñ nahīñ miltī

vahāñ hakīm ke dars-e-ḳhudī ko kyā kiije

visāl-e-dost se bhī kam na ho sakī 'rāshid'

azal se paa.ī huī tishnagī ko kyā kiije

jo be-sabaat ho us sarKHushi ko kya kije

ye zindagi hai to phir zindagi ko kya kije

ruka jo kaam to diwangi hi kaam aai

na kaam aae to farzangi ko kya kije

ye kyun kahen ki hamein koi rahnuma na mila

magar sarisht ki aawargi ko kya kije

kisi ko dekh ke ek mauj lab pe aa to gai

uThe na dil se to aisi hansi ko kya kije

hamein to aap ne soz-e-alam hi baKHsha tha

jo nur ban gai us tirgi ko kya kije

hamare hisse ka ek jura bhi nahin baqi

nigah-e-dost ki mai-KHangi ko kya kije

jahan gharib ko nan-e-jawin nahin milti

wahan hakim ke dars-e-KHudi ko kya kije

visal-e-dost se bhi kam na ho saki 'rashid'

azal se pai hui tishnagi ko kya kije