جو بھی برباد ہو نہیں سکتا

جو بھی برباد ہو نہیں سکتا

وہ تو فرہاد ہو نہیں سکتا

عشق وقت دگر پہ کیوں چھوڑیں

یہ ترے بعد ہو نہیں سکتا

مرے پنجرے کو توڑتے کیوں ہو

جب میں آزاد ہو نہیں سکتا

یہ فرشتوں کا کام ہوتا ہے

آدمی شاد ہو نہیں سکتا

اس پہ تیرا گمان کیسے ہو

دکھ تو ہم زاد ہو نہیں سکتا

ایسے لگتا تھا وہ حسیں چہرہ

ستم ایجاد ہو نہیں سکتا

تجھ سے پہلے تو خیر کیا ہوگا

جو ترے بعد ہو نہیں سکتا

کیا کروں میرا نام انجمؔ ہے

میں زمیں زاد ہو نہیں سکتا