jo bhi guzre dil ke zaKHmon ko nihan rakkha karen

jo bhī guzre dil ke zaḳhmoñ ko nihāñ rakkhā kareñ

ham ḳhayāl-e-ābrū-e-dostāñ rakkhā kareñ

yūrish-e-ġham pai-ba-pai taslīm lekin ye batā

muḳhtasar se dil meñ ye sāmāñ kahāñ rakkhā kareñ

is tarah taḌpeñ ki dil ko bhī ḳhabar hone na deñ

saarī duniyā se judā tarz-e-fuġhāñ rakkhā kareñ

gar taqāzā ho to baḌh kar apne hāthoñ phūñk deñ

rakhne ko har dam ḳhayāl-e-āshiyāñ rakkhā kareñ

zindagī kā ahl-e-dil dete raheñ kuchh to subūt

gar nahīñ sho'la to kam se kam dhuāñ rakkhā kareñ

rok leñ rasta na jaane zulmateñ kis moḌ par

us kī yādoñ ko safar meñ zau-fishāñ rakkhā kareñ

rah-ravān-e-shauq jab hai ek hī manzil to phir

ek jaada ek mīr-e-kārvāñ rakkhā kareñ

hai agar nazroñ meñ koī ḳhūb-sūrat inqalāb

zehn meñ maazī kī raushan dāstāñ rakkhā kareñ

dushman-e-jāñ dost ban jaa.e ye mumkin hai 'na'īm'

dil meñ itnī ḳhush-gumānī to miyāñ rakkhā kareñ

jo bhi guzre dil ke zaKHmon ko nihan rakkha karen

hum KHayal-e-abru-e-dostan rakkha karen

yurish-e-gham pai-ba-pai taslim lekin ye bata

muKHtasar se dil mein ye saman kahan rakkha karen

is tarah taDpen ki dil ko bhi KHabar hone na den

sari duniya se juda tarz-e-fughan rakkha karen

gar taqaza ho to baDh kar apne hathon phunk den

rakhne ko har dam KHayal-e-ashiyan rakkha karen

zindagi ka ahl-e-dil dete rahen kuchh to subut

gar nahin sho'la to kam se kam dhuan rakkha karen

rok len rasta na jaane zulmaten kis moD par

us ki yaadon ko safar mein zau-fishan rakkha karen

rah-rawan-e-shauq jab hai ek hi manzil to phir

ek jada ek mir-e-karwan rakkha karen

hai agar nazron mein koi KHub-surat inqalab

zehn mein mazi ki raushan dastan rakkha karen

dushman-e-jaan dost ban jae ye mumkin hai 'na'im'

dil mein itni KHush-gumani to miyan rakkha karen