جو بھی کردار سے لکھی جائے

جو بھی کردار سے لکھی جائے

زندگی کیوں نہ وہ پڑھی جائے

دفتر غم میں آ کے بیٹھا ہوں

آج کوئی غزل کہی جائے

ذہن کا بوجھ کچھ تو ہلکا ہو

گرد یادوں کی صاف کی جائے

زندگی کے حساب میں گم ہوں

حل پہیلی یہ کیسے کی جائے

چند لمحے ہی کھینچ لو اس سے

زندگی شام سی ڈھلی جائے

لب کے کھلتے ہی کان کھل جائیں

ایسے لہجے میں بات کی جائے

بے تحاشہ ہے بھیڑ خود مجھ میں

اب جگہ اور کس کو دی جائے

دل کا شیشہ جو توڑ کر رکھ دے

بات وہ کیوں کہی سنی جائے

جس کو دیکھو اس انتظار میں ہے

شور اٹھے تو خامشی جائے

صرف اردو زبان ہے جو ادیبؔ

رس محبت کا گھولتی جائے