jo bhi kirdar se likhi jae

jo bhī kirdār se likhī jaa.e

zindagī kyoñ na vo paḌhī jaa.e

daftar-e-ġham meñ aa ke baiThā huuñ

aaj koī ġhazal kahī jaa.e

zehn kā bojh kuchh to halkā ho

gard yādoñ kī saaf kī jaa.e

zindagī ke hisāb meñ gum huuñ

hal pahelī ye kaise kī jaa.e

chand lamhe hī khīñch lo is se

zindagī shaam sī Dhalī jaa.e

lab ke khulte hī kaan khul jaa.eñ

aise lahje meñ baat kī jaa.e

be-tahāsha hai bhiiḌ ḳhud mujh meñ

ab jagah aur kis ko dī jaa.e

dil kā shīsha jo toḌ kar rakh de

baat vo kyoñ kahī sunī jaa.e

jis ko dekho is intizār meñ hai

shor uTThe to ḳhāmushī jaa.e

sirf urdu zabān hai jo 'adīb'

ras mohabbat kā gholtī jaa.e

jo bhi kirdar se likhi jae

zindagi kyon na wo paDhi jae

daftar-e-gham mein aa ke baiTha hun

aaj koi ghazal kahi jae

zehn ka bojh kuchh to halka ho

gard yaadon ki saf ki jae

zindagi ke hisab mein gum hun

hal paheli ye kaise ki jae

chand lamhe hi khinch lo is se

zindagi sham si Dhali jae

lab ke khulte hi kan khul jaen

aise lahje mein baat ki jae

be-tahasha hai bhiD KHud mujh mein

ab jagah aur kis ko di jae

dil ka shisha jo toD kar rakh de

baat wo kyon kahi suni jae

jis ko dekho is intizar mein hai

shor uTThe to KHamushi jae

sirf urdu zaban hai jo 'adib'

ras mohabbat ka gholti jae