جو بھی ملتا ہے اسے پاتا ہوں دیوانہ ترا

جو بھی ملتا ہے اسے پاتا ہوں دیوانہ ترا

ہے بجا شہرت کی دیوی ناز فرمانا ترا

تو بھی اٹھ جائے گا جب اٹھ جائے گا دانہ ترا

طے ہے اس دنیا سے بھائی ایک دن جانا ترا

مست کر دیتا ہے ہر انداز مستانہ ترا

بیٹھنا اٹھنا ترا آنا ترا جانا ترا

وہ بھی کیا دن تھے کہ جب مجھ سے تھا یارانہ ترا

یاد آتا ہے وہ آنکھوں میں سما جانا ترا

دل بہلنے کی کوئی صورت نظر آتی نہیں

یاد بھی آتا نہیں اب یاد آ جانا ترا

ایک مدت ہو گئی ہے کل کے وعدے کو مگر

کل کا وعدہ یاد آ جاتا ہے روزانہ ترا

آدمی کو آئنہ کردار ہونا چاہیے

کام آئے گا نہ تیرے آئنہ خانہ ترا

کیسے کیسے لوگ آئے اور رخصت ہو گئے

اے شکیلؔ اچھا نہیں اس درجہ اترانا ترا