jo bhi milta hai use pata hun diwana tera

jo bhī miltā hai use paatā huuñ dīvāna tirā

hai bajā shohrat kī devī naaz farmānā tirā

tū bhī uTh jā.egā jab uTh jā.egā daana tirā

tai hai is duniyā se bhaa.ī ek din jaanā tirā

mast kar detā hai har andāz-e-mastāna tirā

baiThnā uThnā tirā aanā tirā jaanā tirā

vo bhī kyā din the ki jab mujh se thā yārāna tirā

yaad aatā hai vo āñkhoñ meñ samā jaanā tirā

dil bahalne kī koī sūrat nazar aatī nahīñ

yaad bhī aatā nahīñ ab yaad aa jaanā tirā

ek muddat ho ga.ī hai kal ke vā'de ko magar

kal kā vā'da yaad aa jaatā hai rozāna tirā

aadmī ko ā.ina-kirdār honā chāhiye

kaam aa.egā na tere ā.ina-ḳhāna tirā

kaise kaise log aa.e aur ruḳhsat ho ga.e

ai 'shakīl' achchhā nahīñ is darja itrānā tirā

jo bhi milta hai use pata hun diwana tera

hai baja shohrat ki dewi naz farmana tera

tu bhi uTh jaega jab uTh jaega dana tera

tai hai is duniya se bhai ek din jaana tera

mast kar deta hai har andaz-e-mastana tera

baiThna uThna tera aana tera jaana tera

wo bhi kya din the ki jab mujh se tha yarana tera

yaad aata hai wo aankhon mein sama jaana tera

dil bahalne ki koi surat nazar aati nahin

yaad bhi aata nahin ab yaad aa jaana tera

ek muddat ho gai hai kal ke wa'de ko magar

kal ka wa'da yaad aa jata hai rozana tera

aadmi ko aaina-kirdar hona chahiye

kaam aaega na tere aaina-KHana tera

kaise kaise log aae aur ruKHsat ho gae

ai 'shakil' achchha nahin is darja itrana tera