jo bhi yakja hai bikharta nazar aata hai mujhe

jo bhī yakjā hai bikhartā nazar aatā hai mujhe

jaane yuuñ hai bhī ki aisā nazar aatā hai mujhe

chashm-e-vā meñ to vahī manzar-e-ḳhālī hai jo thā

muuñd luuñ aañkh to kyā kyā nazar aatā hai mujhe

mā.il-e-arz-e-tamannā hai na hai vaqf-e-malāl

ai mire dil tū Thahartā nazar aatā hai mujhe

pas-e-nazzāra koī ḳhvāb-e-gurezāñ hī na ho

dekhne meñ to tamāshā nazar aatā hai mujhe

bāñdh luuñ raḳht-e-safar lauT chalūñ ghar kī taraf

tirī jānib se ishāra nazar aatā hai mujhe

tujhe kyūñkar ho ye ma.alūm mire māh-e-tamām

dāġh-e-dil kaise sitāra nazar aatā hai mujhe

kashti-e-jāñ yahī ik-ādh bhañvar aur hai bas

kahīñ nazdīk kināra nazar aatā hai mujhe

dekhne dekhne meñ farq huā kartā hai

tumhī batlāo ki kaisā nazar aatā hai mujhe

jo bhi yakja hai bikharta nazar aata hai mujhe

jaane yun hai bhi ki aisa nazar aata hai mujhe

chashm-e-wa mein to wahi manzar-e-KHali hai jo tha

mund lun aankh to kya kya nazar aata hai mujhe

mail-e-arz-e-tamanna hai na hai waqf-e-malal

ai mere dil tu Thaharta nazar aata hai mujhe

pas-e-nazzara koi KHwab-e-gurezan hi na ho

dekhne mein to tamasha nazar aata hai mujhe

bandh lun raKHt-e-safar lauT chalun ghar ki taraf

teri jaanib se ishaara nazar aata hai mujhe

tujhe kyunkar ho ye malum mere mah-e-tamam

dagh-e-dil kaise sitara nazar aata hai mujhe

kashti-e-jaan yahi ik-adh bhanwar aur hai bas

kahin nazdik kinara nazar aata hai mujhe

dekhne dekhne mein farq hua karta hai

tumhi batlao ki kaisa nazar aata hai mujhe