jo bhigi raat to aaseb ke lashkar nikal aae

jo bhīgī raat to aaseb ke lashkar nikal aa.e

kisī dīvār se āñkheñ kisī se sar nikal aa.e

chhuTī jo dhuñd to kitne hī sūrat-gar nikal aa.e

ki manzar ke pas-e-manzar ka.ī manzar nikal aa.e

sulagtī ret phūloñ kī tarah bistar nikal aa.e

bahut mumkin hai sahrā meñ bhī koī ghar nikal aa.e

ugiiñ vīrāniyāñ kamre meñ chhat meñ dar nikal aa.e

mirī dīvāngī ke phir se bāl-o-par nikal aa.e

ḳhamoshī phail kar jañgal ho aur phir shāḳh-e-sargoshī

mirī tanhā.iyoñ kī jhiil ke uupar nikal aa.e

khaḌī thiiñ donoñ jānib niil meñ paanī kī dīvāreñ

ki jo ahl-e-asā the beach se ho kar nikal aa.e

jalan yādoñ kī us ke tan-badan meñ aisī raushan ho

ki vo bārish meñ kamre se khulī chhat par nikal aa.e

kahīñ raḳhna zarūr ahbāb kī sāzish meñ thā 'saifī'

ki ham phir halqa-e-girdāb se bach kar nikal aa.e

jo bhigi raat to aaseb ke lashkar nikal aae

kisi diwar se aankhen kisi se sar nikal aae

chhuTi jo dhund to kitne hi surat-gar nikal aae

ki manzar ke pas-e-manzar kai manzar nikal aae

sulagti ret phulon ki tarah bistar nikal aae

bahut mumkin hai sahra mein bhi koi ghar nikal aae

ugin viraniyan kamre mein chhat mein dar nikal aae

meri diwangi ke phir se baal-o-par nikal aae

KHamoshi phail kar jangal ho aur phir shaKH-e-sargoshi

meri tanhaiyon ki jhil ke upar nikal aae

khaDi thin donon jaanib nil mein pani ki diwaren

ki jo ahl-e-asa the beach se ho kar nikal aae

jalan yaadon ki us ke tan-badan mein aisi raushan ho

ki wo barish mein kamre se khuli chhat par nikal aae

kahin raKHna zarur ahbab ki sazish mein tha 'saifi'

ki hum phir halqa-e-girdab se bach kar nikal aae