jo bujh chuke hain wo lamhe ujalta kyon hai

jo bujh chuke haiñ vo lamhe ujāltā kyoñ hai

mire badan pe ḳharāsheñ bhī Dāltā kyoñ hai

maiñ mo'tariz to nahīñ huuñ magar ye samjhā de

jo mārnā hai to duniyā ko pāltā kyoñ hai

tujhe talāsh hai jis kī vo terī zaat meñ hai

ye koh-o-ban ye samundar khañgāltā kyoñ hai

nahīñ hai vo tirā koī to phir zarūrat kyā

tū us ke husn ko sheroñ meñ Dhāltā kyoñ hai

agar nahīñ huuñ maiñ mānind-e-mehr-o-mah to mujhe

zamīñ se koī falak par uchhāltā kyoñ hai

shikast-o-marg meñ jab tarz-e-āsmāñ hai to phir

tū apne TuuTe hue par sambhāltā kyoñ hai

na maiñ rasūl na haadī na peshvā na imaam

mujhe tū mere vatan se nikāltā kyoñ hai

jo bujh chuke hain wo lamhe ujalta kyon hai

mere badan pe KHarashen bhi Dalta kyon hai

main mo'tariz to nahin hun magar ye samjha de

jo marna hai to duniya ko palta kyon hai

tujhe talash hai jis ki wo teri zat mein hai

ye koh-o-ban ye samundar khangalta kyon hai

nahin hai wo tera koi to phir zarurat kya

tu us ke husn ko sheron mein Dhaalta kyon hai

agar nahin hun main manind-e-mehr-o-mah to mujhe

zamin se koi falak par uchhaalta kyon hai

shikast-o-marg mein jab tarz-e-asman hai to phir

tu apne TuTe hue par sambhaalta kyon hai

na main rasul na hadi na peshwa na imam

mujhe tu mere watan se nikalta kyon hai