jo bure shaKHs ko bhala samjhe

jo bure shaḳhs ko bhalā samjhe

aise logoñ ko phir ḳhudā samjhe

maiñ ne kuchh aur hī kahā thā magar

ye batā.eñ ki aap kyā samjhe

ye ḳhatā gar nahīñ to phir kyā hai

vo samajh se bhī jab sivā samjhe

pahle mujh ko samajh na paa.e vo

phir huā yuuñ ke barmalā samjhe

ham bhī kitne the nā-samajh haa.e

us ke parde ko hī hayā samjhe

panchhiyoñ ne hilā.e the patte

aur musāfir use havā samjhe

us pe ahl-e-vafā kī la.anat hai

bevafā ko jo bā-vafā samjhe

be-ḳhatā mat kaho use yaaro

jo ḳhatā ko bhī na ḳhatā samjhe

vo duā de rahā thā jiine kī

aur ham us ko badduā samjhe

barsoñ rotī rahī vo furqat meñ

barsoñ ham us ko ik adā samjhe

jo bure shaKHs ko bhala samjhe

aise logon ko phir KHuda samjhe

main ne kuchh aur hi kaha tha magar

ye bataen ki aap kya samjhe

ye KHata gar nahin to phir kya hai

wo samajh se bhi jab siwa samjhe

pahle mujh ko samajh na pae wo

phir hua yun ke barmala samjhe

hum bhi kitne the na-samajh hae

us ke parde ko hi haya samjhe

panchhiyon ne hilae the patte

aur musafir use hawa samjhe

us pe ahl-e-wafa ki lanat hai

bewafa ko jo ba-wafa samjhe

be-KHata mat kaho use yaro

jo KHata ko bhi na KHata samjhe

wo dua de raha tha jine ki

aur hum us ko baddua samjhe

barson roti rahi wo furqat mein

barson hum us ko ek ada samjhe