jo bu-e-zindagi mujhe kiran kiran se aai hai

jo bū-e-zindagī mujhe kiran kiran se aa.ī hai

haqīqatan vo aap hī ke pairahan se aa.ī hai

hamāre jism o ruuh ko surūr de ga.ī vahī

nasīm-e-ḳhush-gavār jo tire badan se aa.ī hai

ye kaun shaḳhs mar gayā ye kis kā hai kafan kaho?

ki zindagī kī bū mujhe isī kafan se aa.ī hai

tarīqat-e-nabard meñ hamārā silsila hai aur!

ye ḳhud-kushī kī rasm-e-bad to kohkan se aa.ī hai

kalī to phir kalī huī mahak uThe haiñ ḳhaar bhī

maiñ jāntā huuñ ye nasīm kis chaman se aa.ī hai

khule rakhe haiñ maiñ ne saare rañg-o-bū ke rāste

mire chaman kī ye phaban chaman chaman se aa.ī hai

maiñ 'sābir'-e-suḳhan-tarāz kyuuñ kisī ko dosh duuñ

ki mere sar pe har balā mire suḳhan se aa.ī hai

jo bu-e-zindagi mujhe kiran kiran se aai hai

haqiqatan wo aap hi ke pairahan se aai hai

hamare jism o ruh ko surur de gai wahi

nasim-e-KHush-gawar jo tere badan se aai hai

ye kaun shaKHs mar gaya ye kis ka hai kafan kaho?

ki zindagi ki bu mujhe isi kafan se aai hai

tariqat-e-nabard mein hamara silsila hai aur!

ye KHud-kushi ki rasm-e-bad to kohkan se aai hai

kali to phir kali hui mahak uThe hain KHar bhi

main jaanta hun ye nasim kis chaman se aai hai

khule rakhe hain main ne sare rang-o-bu ke raste

mere chaman ki ye phaban chaman chaman se aai hai

main 'sabir'-e-suKHan-taraaz kyun kisi ko dosh dun

ki mere sar pe har bala mere suKHan se aai hai