جو چاک ہیں دل کے زخموں میں سینے ہی پڑے تو سی لیں گے

جو چاک ہیں دل کے زخموں میں سینے ہی پڑے تو سی لیں گے

دنیا میں ہمیں جب جینا ہے جس حال میں ہوں گے جی لیں گے

آزار محبت کا درماں کیا ہوگا ناصح باتوں سے

ہم تلخ نصیحت سن لیں گے ہم زہر کے ساغر پی لیں گے

وہ حشر بہ داماں ہیں تو کیا ہم ظلم و ستم کو سہتے ہیں

جب ان کا ہو کر جینا ہے جس طرح بھی ہوگا جی لیں گے

ہے تیرا یہ منشا اے ظالم ہر ظلم سہیں اور کچھ نہ کہیں

ہم تیری خاطر دشمن جاں امڈے ہوئے آنسو پی لیں گے

ان شوخ نگاہوں کے صدقے کیا تیر پہ تیر برستے ہیں

وہ ہم کو صحافیؔ دیکھا کریں ہم تیروں میں بھی جی لیں گے