جو چارہ گر بن کے آ رہے ہیں علاج غم کا وہ کیا کریں گے

جو چارہ گر بن کے آ رہے ہیں علاج غم کا وہ کیا کریں گے

ہمیں نے یہ روگ ہے خریدا ہمیں خود اس کی دوا کریں گے

سفینہ گرداب میں جو پھنستا تو شکوہ قسمت کا تھا مناسب

ڈبو دے کشتی کو ناخدا ہی تو آپ کس کا گلا کریں گے

قفس میں کیوں پھول رکھ رہے ہو دلاتے ہو یاد بھولی باتیں

جو غم سے مانوس ہو چکے ہیں خوشی کو لے کر وہ کیا کریں گے

امید رہزن سے رہبری کی فریب کھانا ہے اور کیا ہے

جو خود ہوس کے بنے ہیں قیدی وہ کیا کسی کو رہا کریں گے

لباس انسانیت میں ایسے لٹیرے دیکھے ہیں سوزؔ ہم نے

جو خضر کے بھیس میں تو ہوں گے مگر ہمیشہ دغا کریں گے