jo chand lamhon mein ban gaya tha wo silsila KHatm ho gaya hai

jo chand lamhoñ meñ ban gayā thā vo silsila ḳhatm ho gayā hai

ye tum ne kaisā yaqīñ dilāyā muġhālta ḳhatm ho gayā hai

zabān hoñToñ pe jā ke phīkī hī lauT aatī hai kuchh dinoñ se

namak nahīñ hai tire laboñ meñ yā zā.iqa ḳhatm ho gayā hai

gumān gaañv se maiñ chalā thā yaqīn kī manziloñ kī jānib

magar tavahhum ke jañgaloñ meñ hī rāsta ḳhatm ho gayā hai

vo guftugūoñ ke narm chashme kahīñ fazā meñ hī jam ga.e haiñ

vo saare message vo shā.irī kā tabādala ḳhatm ho gayā hai

kal ek sadma paḌā thā ham par ke jis ne dil ko hilā diyā thā

chalo ke siine kā jā.eza leñ ki zalzala ḳhatm ho gayā hai

mire tasavvur meñ itnī vus.at nahīñ ke terā badan samā.e

maiñ tujh ko sochūñ to aisā lagtā hai hāfiza ḳhatm ho gayā hai

maiñ tujh ko pā kar hī mutma.in huuñ ab aur koī talab nahīñ hai

jo aaj tak thā nasīb se vo mutālba ḳhatm ho gayā hai

jo chand lamhon mein ban gaya tha wo silsila KHatm ho gaya hai

ye tum ne kaisa yaqin dilaya mughaalta KHatm ho gaya hai

zaban honTon pe ja ke phiki hi lauT aati hai kuchh dinon se

namak nahin hai tere labon mein ya zaiqa KHatm ho gaya hai

guman ganw se main chala tha yaqin ki manzilon ki jaanib

magar tawahhum ke jangalon mein hi rasta KHatm ho gaya hai

wo guftuguon ke narm chashme kahin faza mein hi jam gae hain

wo sare message wo shairi ka tabaadala KHatm ho gaya hai

kal ek sadma paDa tha hum par ke jis ne dil ko hila diya tha

chalo ke sine ka jaeza len ki zalzala KHatm ho gaya hai

mere tasawwur mein itni wusat nahin ke tera badan samae

main tujh ko sochun to aisa lagta hai hafiza KHatm ho gaya hai

main tujh ko pa kar hi mutmain hun ab aur koi talab nahin hai

jo aaj tak tha nasib se wo mutalba KHatm ho gaya hai