jo chhanw deta hai mujhko ghana shajar ban kar

jo chhāñv detā hai mujh ko ghanā shajar ban kar

maiñ us kā saath nibhātī huuñ us kā ghar ban kar

fazā-e-ilm-o-hunar raas aa ga.ī hai mujhe

ḳhudā kare ki rahūñ harf-e-mo'tabar ban kar

tū chāñd hai to duā hai kabhī ġhurūb na ho

ufuq meñ maiñ bhī rahūñ matl.a-e-sahar ban kar

ġhalat samajhtī thī maiñ us ko rāzdāñ apnā

jo ek saaya sā ubhrā thā ham-safar ban kar

ummīd-o-bīm se jab āzād ho ga.ī 'amabar'

to kāmyāb huī sāhib-e-nazar ban kar

jo chhanw deta hai mujh ko ghana shajar ban kar

main us ka sath nibhati hun us ka ghar ban kar

faza-e-ilm-o-hunar ras aa gai hai mujhe

KHuda kare ki rahun harf-e-mo'tabar ban kar

tu chand hai to dua hai kabhi ghurub na ho

ufuq mein main bhi rahun matla-e-sahar ban kar

ghalat samajhti thi main us ko raazdan apna

jo ek saya sa ubhra tha ham-safar ban kar

ummid-o-bim se jab aazad ho gai 'amabar'

to kaamyab hui sahib-e-nazar ban kar