jo choT khane se Dar rahe hain

jo choT khāne se Dar rahe haiñ

vahī shajar be-samar rahe haiñ

vo chāhte haiñ mujhe Darānā

jo mere zer-e-asar rahe haiñ

jinheñ sikhāyā thā ham ne uḌnā

vo par hamāre katar rahe haiñ

sunā hai vo ab to guftugū bhī

hamāre lahje meñ kar rahe haiñ

parinde shohrat ke rafta rafta

bulandiyoñ se utar rahe haiñ

vo aa rahe haiñ ḳhabar chalī hai

sabhī ke chehre sañvar rahe haiñ

vo tak rahe haiñ mujhe musalsal

bahut se chehre utar rahe haiñ

vāqī.a kitne ye qaid-ḳhāne

yahāñ pe ahl-e-nazar rahe haiñ

ye maut hairat-zada hai 'anjum'

ki log jiine pe mar rahe haiñ

jo choT khane se Dar rahe hain

wahi shajar be-samar rahe hain

wo chahte hain mujhe Darana

jo mere zer-e-asar rahe hain

jinhen sikhaya tha hum ne uDna

wo par hamare katar rahe hain

suna hai wo ab to guftugu bhi

hamare lahje mein kar rahe hain

parinde shohrat ke rafta rafta

bulandiyon se utar rahe hain

wo aa rahe hain KHabar chali hai

sabhi ke chehre sanwar rahe hain

wo tak rahe hain mujhe musalsal

bahut se chehre utar rahe hain

waqia kitne ye qaid-KHane

yahan pe ahl-e-nazar rahe hain

ye maut hairat-zada hai 'anjum'

ki log jine pe mar rahe hain