جو دم کے ساتھ تھے کل تک کبھی جدا بھی نہ تھے

جو دم کے ساتھ تھے کل تک کبھی جدا بھی نہ تھے

وہ آج ایسے ملے جیسے آشنا بھی نہ تھے

کسے گماں تھا وفاؤں بھری رفاقت کو

وہ بھول جائیں گے اتنے تو بے وفا بھی نہ تھے

کسی نے کر دیا کچھ اور بد گماں ہم سے

خفا وہ تھے مگر ایسے گریز پا بھی نہ تھے

ہیں مجھ سے داد طلب حسن نا خدائی کے

وہ لوگ جو مری کشتی کے ناخدا بھی نہ تھے

وفائیں کر کے وفا پر بھی شرمسار تھے ہم

جفائیں کر کے وہ شرمندۂ جفا بھی نہ تھے

مرا علاج مرے چارہ ساز سے نہ ہوا

وگرنہ بزمؔ مرے زخم لا دوا بھی نہ تھے