jo dam mein dam hai to saqi ki justuju hi sahi

jo dam meñ dam hai to saaqī kī justujū hī sahī

nahīñ sharāb to saudā-e-ārzū hī sahī

jo bāñdhnā hai tasavvur hī apnī āñkhoñ meñ

to phir piyāla-o-sāġhar hī kyuuñ subū hī sahī

salāt-e-shar.a nahīñ jis kā ehtimām kareñ

namāz-e-ishq hai ai dil to be-vuzū hī sahī

junūñ meñ chaak hai dāman to fikr-e-sozan kyā

jo ban gayā hai garebāñ to be-rafū hī sahī

jo hai sharāb harīfān-e-bāda-paimā ko

hamāre vāste mauzū-e-guftugū hī sahī

agar ḳhayāl meñ ḳhvāboñ kī guuñj baaqī hai

to aañkh khulte hī ġhoġhā-e-hā-o-hū hī sahī

fasāna apne junūñ kā zabāñ zabāñ pe hai aaj

nahīñ jo sahrā-ba-sahrā to kū-ba-kū hī sahī

jafā-e-nāz agar hai babāñg-e-tabl-o-duhal

to dil-dukhoñ kā gilā surma-dar-gulū hī sahī

jo dam mein dam hai to saqi ki justuju hi sahi

nahin sharab to sauda-e-arzu hi sahi

jo bandhna hai tasawwur hi apni aankhon mein

to phir piyala-o-saghar hi kyun subu hi sahi

salat-e-shara nahin jis ka ehtimam karen

namaz-e-ishq hai ai dil to be-wuzu hi sahi

junun mein chaak hai daman to fikr-e-sozan kya

jo ban gaya hai gareban to be-rafu hi sahi

jo hai sharab harifan-e-baada-paima ko

hamare waste mauzu-e-guftugu hi sahi

agar KHayal mein KHwabon ki gunj baqi hai

to aankh khulte hi ghogha-e-ha-o-hu hi sahi

fasana apne junun ka zaban zaban pe hai aaj

nahin jo sahra-ba-sahra to ku-ba-ku hi sahi

jafa-e-naz agar hai babang-e-tabl-o-duhal

to dil-dukhon ka gila surma-dar-gulu hi sahi