jo dasht KHwabon mein aksar dikhai deta hai

jo dasht ḳhvāboñ meñ aksar dikhā.ī detā hai

vo jāgne pe mirā ghar dikhā.ī detā hai

hamārī ḳhāma-tarāzī se bach ke rahiye huzūr

ki dast-e-mast meñ ḳhanjar dikhā.ī detā hai

jo duur se use dekho to chāñd jaisā lage

qarīb jaao to patthar dikhā.ī detā hai

sanam tarāsh gursana hai in dinoñ shāyad

ki har mujassama lāġhar dikhā.ī detā hai

na jis kī shakl hai us kī na jis kī umr us kī

vo mujh ko shīshe meñ aksar dikhā.ī detā hai

hai us kā maujib-e-tāmīr koī jurm zarūr

jo sab se ūñchā nayā ghar dikhā.ī detā hai

rah-e-farār ḳhalāoñ meñ bhī nahīñ miltī

bas ek gumbad-e-be-dar dikhā.ī detā hai

hai jis kī Thokaroñ meñ āb-e-zindagī 'vāmiq'

vo tishnagī kā samundar dikhā.ī detā hai

jo dasht KHwabon mein aksar dikhai deta hai

wo jagne pe mera ghar dikhai deta hai

hamari KHama-taraazi se bach ke rahiye huzur

ki dast-e-mast mein KHanjar dikhai deta hai

jo dur se use dekho to chand jaisa lage

qarib jao to patthar dikhai deta hai

sanam tarash gursana hai in dinon shayad

ki har mujassama laghar dikhai deta hai

na jis ki shakl hai us ki na jis ki umr us ki

wo mujh ko shishe mein aksar dikhai deta hai

hai us ka maujib-e-tamir koi jurm zarur

jo sab se uncha naya ghar dikhai deta hai

rah-e-farar KHalaon mein bhi nahin milti

bas ek gumbad-e-be-dar dikhai deta hai

hai jis ki Thokaron mein aab-e-zindagi 'wamiq'

wo tishnagi ka samundar dikhai deta hai