jo dekho to wo chehra ajnabi hai

jo dekho to vo chehra ajnabī hai

agar socho to vaj.h-e-zindagī hai

mujhe hai e'tirāf-e-jurm-e-ulfat

mujhe tum se mohabbat ho ga.ī hai

mirī āñkheñ luTātī haiñ jo gauhar

mizāj-e-ishq meñ dariyā-dilī hai

masīhā.ī na tum se ho sakegī

hamārā dard-e-ulfat dā.imī hai

tirā paikar ḳhayāloñ meñ basā hai

har ik sū raushnī hī raushnī hai

hameñ raas aa ga.ī ḳhūbāñ-parastī

baḌī dilkash hamārī zindagī hai

tirī chāhat kā hai ye bhī karishma

adū se bhī hamārī dostī hai

mujhe mai-kash samajhtā hai zamāna

nigāhoñ meñ ḳhumār-e-āshiqī hai

maza jab hai vo kah de be-ḳhudī meñ

qarār-e-jāñ 'ra.īs'-e-vārsī hai

jo dekho to wo chehra ajnabi hai

agar socho to wajh-e-zindagi hai

mujhe hai e'tiraf-e-jurm-e-ulfat

mujhe tum se mohabbat ho gai hai

meri aankhen luTati hain jo gauhar

mizaj-e-ishq mein dariya-dili hai

masihai na tum se ho sakegi

hamara dard-e-ulfat daimi hai

tera paikar KHayalon mein basa hai

har ek su raushni hi raushni hai

hamein ras aa gai KHuban-parasti

baDi dilkash hamari zindagi hai

teri chahat ka hai ye bhi karishma

adu se bhi hamari dosti hai

mujhe mai-kash samajhta hai zamana

nigahon mein KHumar-e-ashiqi hai

maza jab hai wo kah de be-KHudi mein

qarar-e-jaan 'rais'-e-warsi hai